Ve-app-elt …

Disletscht in de Bahn vun Frankfurt heimzues: de Zuu proppevoll, näwe mir un gegeniwer zwei Männer, wu in Urlaub hen welle, per Ditschlandticket. Eigetlig haw-i welle läse, awer desch nit gange. Die Zwii hen in einere Tour gschwätzt un alli paar Minute hen si uf ihrem Smartphone tscheckt, ob ihri Vebindunge au klappe. Un kum isch de Zuu stihbliiwe, zum e ICE durichlosse, s Smartphone rus un nej plant, wil d Iwergangszit numme noch drej Minute lang gsi isch. Nor hen si vezehlt, was si wote mache, wenn si in Hinterzarte akumme sin. Si hen nooch re Wirtschaft gsuecht, wu mr s Fueßballspiil kaan aluege un au noch e Bier dezue kriegt (si sin us Köln gsi).

E paar Stazjuune witer het de Zuu wider ghalte un het dismol glich zwei schnelleri Zii mien vebejlosse. Si sin nervees worre un hen sich entschiide, wil s knapp kinnt werre, in Karlsrueh z iwernaachte. Si hen s Hotel dert buecht un alles het wider guet usgsehne. Nor sin si uf eimol uf d Idee kumme, in Neu-Edinge uszstiige, in so me Provinzkaff, de letschte Stazjuun vor Mannem Hauptbahnhof.

In Mannem het de Zuu, mit dem mir (ich un si au) witer hen welle, sechs Minute Vespätung gha, ich ha ne also noch kriegt. De Zuu isch nor zwei Minute z spoot in Karlsrueh akumme. Awer d Schwarzwaldbahn isch au vier Minute z spoot abgfahre.

Ich hoff, selli Zwii hen änewä e schiiner Owe gha, mit Kicke un Bier, au wenn si an sellem Taa nit uf Hinterzarte kumme sin. Mr kaan sich vor luter Appe au selwer veäpple.


Wendelinus Wurth (Alemannisch)