Genau!
Ich eisch des oh schunn uffgfalle? Genau!
Hedd ihr des oh schunn gmerkt? Genau!
Seid emme guhde Johr hehrd ma des Wort bei alle passende un uhpassende Gelegeheide. Genau!
Egohl wu bisch und egohl was machsch. Genau!
Iwwerohl isch jemand, der wu des Wort laufend benutze dudd. Genau!
Meischdens em Schluss vunneme Satz. Genau!
Un dann liegts sou uhnäidisch rum wie ä Schiff, des wu uff de Strand uffgloffe isch, Genau!
Oh em Fernseh sohre sie es laufend. Genau!
Un s’beschde dodroh isch, dass es in de seltenschde Fell basse dud. Genau!
Meischdens sinns sou jüngere Mähdlin oder junge Dame, die wu des Wort verwende. Genau!
Ich kanns ball nimmie hehre. Genau!
Egohl was ma frehgt oder was ma sescht – immer kummt als Antwort blous des ohne Wort. Genau!
Meinere Froh isch’s oh schun uffgfalle. Genau!
Wenn mir ohweds des Perfekte Dinner gugge, dann führe ma schunn ä Strichlist. Genau!
Jedesmohls wenn sou ä Kochkandidatin des Wort verwende dudd, dann mache mir en Strich. Genau!
Geschdern simma widda uff 25 Strich kumme! Genau!
Guggd mohl selwa druff, wie oft manche Leit des Wort benutze, un wie oft des iwwerhaupt kohn Sinn meschd. Genau!
Ich glohb, ma nennt sou was e Fillwort. Genau!
Des isch wie ä Kranged oder wie en Virus. Genau!
Ich hoff blous, dass des net ohschteckend isch. Genau!