Was des mit dem Glick so uff sich hɔt.

Grad wie ma heit middagesse wollte, isch er kumme: de schwarze Mɔnn, de Schɔrnschdefeger. Un weil er ɔim jo Glick bringt, hawwe mern reiglosst. Do hot er an unsere zwee Kamin rumgscherrt un nɔrd wollt er so en krumme Betrag hewwe, dass ich en gfrogt hab, wie sich der zɔmmesetzt.

Un nɔrd hot er verzählt, wie des geht, dass net in jedem Haus de gleiche Schɔrnschde isch, die ɔne sin lɔng un die ɔnnere kerzer un bei mɔnche Leit muss ma unners Dach krabble oder sogar denne ufs Dach steige un mɔnche hewwe blouß ɔner un ɔnnere hewwe zwee.

Do isch mir widder des Schɔrnschdemuseum in Santa Maria Maggiore eigfalle, wu ma die Gschicht vun dene arme Kinner verzählt kriegt, die frieher in die Schɔrnschde neigekrabbelt senn un de Dreck rausgebutzt hewwe. Des war e ɔnneri  Dreckserwet wie heit un iwwerhaubt muss ma sich mol iwwerlege bei dene moderne Heizunge un Wärmebumbe do gibt’s jo glei gar nix zum Butze.

Do hawwich gedenkt, dass des denne Schɔrnschdefeger am End so geht wie uns Mundartautɔre: Ob der Beruf irgendwɔnn ausschderwe deet, hawich den Mɔnn dɔnn gfrogt. Der hot blouß glacht un gsaat, dass des mit dem Butze zwar immer wenicher werre deet, awer in Zukunft hätta dɔnn ɔnnere Ufgawe: Energieberoter zum Beischbiel, Messungen durchfiehre un Iwerpriefunge vun Heizunge mache.

Ma secht jo immer, wɔmma vum Ruß vun dem Schɔrnschdefeger ebbes abkriegt, hot ma Glick. Unser Schɔrnschdefeger hot zwar en schwarze Ozug ɔghabt, awer do war kɔn Ruß dro. Der war sauwer. Schad hawi mer gedenkt. De Schɔrnschdefeger hot wenigschdens e Zukunft, awer unser Mundart werd aa immer wenicher. Un was wird dɔnn aus de Mundartautɔre? Sprochberoter fer Redewendunge, wu kɔner meh verschdeht?

Text und Fotos: Elfie Neubauer-Theis