Verricktes Wedder odder fåhrn mer in de Urlaub?

Ball werd widder Summer odder ´s isch ball´s gånze Joahr sou.
Was wår des frieher? Fümf Woche hemmer Schnäi ghatte, Ånfång der 60er Joahrn wår der Negga zugfroan. Å Schlittschuh wärn mer druff gfåhrn, wånn mer die ghabt häde. Im Summer bei hechstens 30° gings dånn ab ins Schwimmbåd. Do hosch net viel mehner gebraucht als ä Badhous.

Un jetzat? An Silveschter 15°, im März als ämol an die 25°.
Un was wåren des Joahr mit der Kalt Sophie und ihre Gselle? Uff die kannsch dich å nemme verlosse. Im Juni sinn dånn die Temperadure uff 35° gekleddert. A do brauchsch doch net noch Itålie odder Spånie zu fåhrn.
Des gånze Lumbezeugs, die Insekte do vum Mittelmeerraum, von denne kannsch dich å do steche losse. De Sunnebrånd kannsch der bei uns å holle – alles gratis verstäiht sich.
Die Sterch flieje wie viel ånnere Veggel å nemme fort. Do brauche se net zurückzuflieje. Die sin jo net bled.
Wånn awwa doch åns Mittelmeer willsch, musch dich vielleicht ball impfe losse, wie wånn noch Afrikå fliegsch.

A bei uns in de Sunn hälsch´s ball net aus. Was machsch? Gäisch in de Schadde odder in de Wald. Odder du vergniegsch dich im Schwimmbåd. Des is dånn sou wie in Itålie. Des Eis kriegsch beim Italiener in Deitschlånd å genau so gut. Un die Pizza hosch bei uns als gånzes Esse.
Du musch å net so weit fåhrn. Bei uns hemmer noch un nöcher Bauschtelle, Umleidunge un Schtaus –awwa viel wenischer-, do brauchsch net uff die Autobåhn.

Ånnererseits will mer halt å ämol ånnere Länner sehe un dem Nochwuchs net blouß Schwimmbådwasser un gemähte Råse zeije.

Willi Dehoust  (Rheinfränkisch/ Kurpfälzisch)